بعد يوم طويل من العناء والمشقة والإرهاق في العمل تقابلت مع صديقي احمد موسى الطالب المستجد في كلية التجارة الفرقة الأولى ولقيته فرحان جدا وسألته كالعادة أنت عامل إيه فى الجامعة
قال كله تمام بدأت يعنى أتعرف على الناس بس فيه فرق كبير بين الجامعة والثانوي
قلت له طبعا أنت كبرت سنة
احمد : لاء ! أنا اقصد حاجات ثانية
أنا : تقصد أيه ؟
احمد : أقصد أن في الجامعة مساحة كبيرة من الحرية وعمله زى صالون ثقافي تتعلم فيه كل حاجة
أنا : ازاى ؟
احمد : أنت عارف أنا لما رحت أول يوم شوفت حاجات غريبة أول مرة أشوفها
أنا :زى إيه ؟
احمد : يعنى لاقيتهم عاملين استقبال كبير جدا بالطلاب الجدد
أنا : الاتحاد تقصد ؟
احمد : لاء مش الاتحاد بس الأحزاب زى العمل والوفد والناصري والتجمع والإخوان
أنا : كل ده ؟
احمد : ايوه كل واحد عامل لنفسه مقر يرشد الطلاب وبعرض فكرته فى حرية تامة
أنا : مستعجبا !!! والأمن فين ؟
احمد : امن إيه يا عم ده حرية فكرية هما قالوا كده
أنا : حرية إيه ؟
احمد : حرية بجد يعنى كل واحد بيعبر عن فكره ويدافع عن قضيته يعنى تلاقى الإخوان في مقرهم بيرشدوا الطلاب وينشروا فكرتهم وكذا الناصريين والوفد والتجمع وكل الاتجاهات السياسية وتلاقى مجلات الحائط فى كل مكان بدافع عن قضية معينة مثل قضايا العالم الإسلامي وبتحارب قضايا أخرى زى الغلاء و الفساد
أنا : ازاى ؟
احمد : يعنى وإحنا في طرقات الكلية تلاقى مجلة تدافع عن قضية فلسطين وتلاقى الطلاب واقفين حولها بيقرءوا ويتناقشوا في كل ما يخص القضية بين مؤيد ومعارض وتلاقى مجلة ثانية تناقش وبتحارب قضايا الفساد وغلاء الأسعار وبرده تلاقى حولها ناس تناقش وتحلل بين مؤيد ومعارض للنظام اللي تلاقيه يقول إن النظام صح واللي يقول إن النظام فشل في سياساته حتى الفن و الكورة تلاقى الناس تتكلم فيه
أنا : كل ده شوفته في يوم يا احمد
احمد : أنا من أسبوع في الجامعة وشوفت ازاى كمان الطلاب بتحتفل بشهر رمضان من كل الاتجاهات و بيعلقوا زينة في المدرجات وفى الطرقات ويقدموا هدايا للطلاب زملاءهم والأساتذة فى جو ملئ بالحب والمودة
أنا : يا عم كل ده في الجامعة وفين امن الكلية ؟
احمد : امن أيه يا أستاذ أنا بقول لك كل ده بيتم فى حرية تامة إحنا داخل الحرم الجامعي أمال لو قولت لك على المسيرة السلمية اللي طافت أرجاء الجامعة علشان تدافع عن الصحفيين الأربعة رؤساء التحرير وبتطالب بالرجوع في الحكم عليهم و بتندد بالمحاكم العسكرية للمدنيين
أنا : مسيرة سلمية ومفيش حد اعترض
احمد : ولا اى حد اتتكلم
وفجأة سمعت صوت جرس بيرن لاقيت الحاجة بتصحينى وبتقول اصحى بسرعة علشان تلحق السحور وصلاة الفجر وبعد الصلاة سألت على احمد لاقيته ممنوع من دخول الجامعة

نكمل فى المرة القادمة